النومه ف أحضانك جوع بقلم الشاعرة : أمل رماح

مش غاوي النومه ف أحضانك
طول م ضلوعك مش بتضم
أنا كده عاجز أعيش جواكي
طول ما بتحمي ولاد العم..
داري دموعك داري هواكي
ولا يصعبش عليك الدم..
خلي الشجرة بطرحها عالي
والجوع كافر..عزمه يلالي..
وازرعى ليل وحصاده سواد
لجمي صوت الحق عناد
على أسوار السجن وضحي
باللي بيبني وشايفك زاد..
هو صلاح الدين هيعود!!
ولا القدس لازمله حدود
ولا كرامة أهل النخوه
مش موجوده غير بحدود..
صحي ضمير اللي محاوطينك
حسي عرقنا مشبع طينك
سيبك م اللي كلامه وعود
ساعة الجد يطلع عينك..
نفسي أقولك كلمة حبيبتي
ولو إن الصوت مش مسموع
النومه في أحضانك غربه
والغربه على سنينك جوع