الخميس، 4 أغسطس 2016
الجمعة، 1 يوليو 2016
تفاصيلك ... بقلم الشاعر / محمد صبري
#تفاصيلك
ديما
بيهمها التفاصيل
قميصك لما يتكرمش
وكسرة
البنطلون ع السيف
وطقمك قد ايه لايق
ملامحك
وانت متدايق
و الفاظك
وانت بتقولها
دراعك لما بتشاور
وفيه عابر
في وسط زحام
وبتكون ع الطريق
سايق
ونبرة الاسي في صوتك
وانت
بتعزي صاحب ليك
في حالة الكرب
وحواجبك
وانت بتابع
علي القنوات
ف حالة حرب
و هزة جسمك
دي بتعرفها
انك دلوقتي
زي غريق
واما صوت المعلقة يخبط
في قلب الصحن
و انت بتشفط الشروبة
بشكل بريء
وبتدندن
و واقع طحن
صحيح انت
والا
دي حالة في وقت
المحن
تليفونك
لما مكالمة مهمة بتجيلك
وعلي فجأة يقوم فاصل
مخلص شحن
رمشك
لما بيرتجف منك
من الخضة
لما بتلمح بنت
حلاوتها
نار....شطة
تقول
اشطة
وبعديها
بقت ورطة
عارفة
إنت في الكورة
لعيب حريف
لكن
اهم تفصيلة في حياتك
متعرفهاش
انك بتعرق في الشتا
وبتبقي سقعان
في عز أوقات
المصيف
#محمد_صبري
الخميس، 21 أبريل 2016
مانيش موهوب .....بقلم / كرم شحات
... مانيش موهوب .....
مانيش موهوب ولآ شاعر
وصعب إنى على نفسى
أقولها ف يوم
وكلى يدوب من الأخر
بحب الشِعر وبحوره بتسحرنى
فاحاول اعوم
واقدّر كل مين قلمه
بيكتب شىء يمتْعنا
وادعيله يزيد فضله
ويفضل فِكره يجمعنا
بإحساس السلام والخير
وإبداعه اللى كله جميل
يدوم لسنين ويسعدنا
بحرف بيروى زى النيل
نفوس وقلوب
مانيش موهوب
مانيش موهوب لكن بحلم
أكون فنان مالهوش مثيل
اجمْع م الحروف كلمة
تلم الشمل وتداوى اللى قلبه عليل
اكون كاتب كبير محبوب
وأشعارى تلف دروب
فتصبح بين كتير بسمة
تشد العزم وتوصلنا للمطلوب
نصير قبل الأمم قدام
بجهد وفهم للإسلام
وترجع لينا عزتنا
فنقدر نقطف الأحلام
وننهى حروب
مانيش موهوب
# كيمو #
الأربعاء، 13 أبريل 2016
كل الحنان فى ايديكى...بقلم / محمد صلاح
كل الحنان فى ايديكى
كل العذاب فى عينيكى
كل الشعرا عاشو كتبو قصايد ليكى
لكن انا قولت صعب الوصف فيكى
كتر الغرام ساعات
وأصبح ذكريات
فاضل ايه من ريحتك غير شوية جوابات
طول عمرك غاوية السفر
ولأجل نصيبى انا حبيتك من وسط البنات
ومن كتر الصبر معاكى اتعلمت الثبات
ازاى اكون قيس وانتى مش ليلى
الحب مش كلام للحب 100 معنى
بعدتى انتى كتير لما الزمن جمعنا
حلفتى 100 يمين لتذودى وجعنا
ازاى تكونى رحالة وتسألى مين اللى فرقنا
لبستك جلباب حرير عشان يفرحنا
عاشقة ليه للبعد وبتلومى فى نصيبنا
راجعة ليه تبكى وتقولى أشمعنا
أسامحك بعد ايه بعد ما نزلت دموعنا
أشمعنا انا وانتى مش ليلى
#ازاى_أكون_قيس_وانتى_مش_ليلى #نص_جديد #الشاعر_البكواتى
بطْل بقى الطيبة .....بقلم / كرم شحات
..... بطْل بقى الطيبة .....
من مدة مش كنا
أنا وإنت قررنا
هنتوب وننساها
ووعدنا وحلفنا
عنها لنستغنى
بالدمع وياها
أُمال فى إيه حنيت
وتقول نعود ليها
علشان قالتها ياريت
أنا أسفة عديها
طب قولى يا قلبى
إيه شوفت خير منها
ولآ إنت مش قلبى
اللى إنجرح منها
اللى إتئلم زى
ولآ إتظلم قدى
إزاى وليه يسمح
ترجع تكون جمبى
بطْل بقى الطيبة
ورضاك تكون محروم
من غيرها أحلى كتير
ومالهوش أى لزوم
نرجع لشىء بياع
وغرام هناه أوجاع
مع واحدة قساية
معظم كلامها خداع
مرّنا المكتوب....بقلم / أحمد محمد إبراهيم
مرّنا المكتوب
'''''''''''''''''''''''
انا عمري ليكي علي المدي
وف قلبي ليكي الاهتمام
لمّا بحس بغربتي
حضنك بلادي والسلام
''''''''''
انتي اللي ليكي الجرح لم
وعن الجراح القلب صام
انتي اللي بعدك شلت هم
وفلحظه صار قلبي حطام
-----------------------
قوليلي ليه اتغيرت بينا السنين
ما كنّا قلنا الجرح لم وراح أنين
مستكتره الدنيا علينا الفرحه ليه
العمر راح وللاّ احنا هنموت مجروحين
'''''''''''''
ادّينا فرصه ي عمر نثبت خير قلوب
العيب مليك انت اللي فرّقت الدروب
لو كانت ( لو) بتنفع كنت هسقيها
وهنحصد ايه من(لو)غيرمر كان مكتوب
تحياتي /
#احمد_محمد_ابراهيم
ببكي وبتألم...بقلم /عمرو اللمعي
يا امايا ان ببكي وبتألم
يا امايا الحضن الطيب فين
يا امايا انا منك بتعلم
وبحبك جدا من صغري
علي وشي ملامح حبك ظاهره
وتملي بقول فيكي الاشعار
وبقول للكون انك طاهره
ليه دمي فيكي يا طاهره رخيص
وتملي تقولي عني خسيس
عايزاني اهز كتير وأطاطي
ليه حضن الام ياخلق غريب
وعتابها بيبقي رصاص مطاطي
وحياة الحب اللي حايشني
وصديقي اللي بجد واحشني
وفروض الطاعه وحب النيل
انا اكتر واحد بيحبك
وبدوب ف ترابك
انا عاشق كل التفاصيل
انا سائل خبط علي بابك
والثوره دليل
انا مش خاين
انا بعشق سوس العشه
وطوب القصر
انا دايب جدا ف عنيكي
بالراحه يا مصر
#عمرواللمعي
السبت، 9 أبريل 2016
لسا بتحبيه : بقلم الشاعر / محمد صلاح '' الشاعر البكواتي ''
لسا بتحبيه
انتي لسا بتحبيه
ولسا مشتاقة لعنيه
وكمان ملهوفه عليه
هوا ده اللي اتعلمتيه
بعد ما جرحك وسابك
تبكي من نار لياليه
فين كلامو فين الوعود
حتي غرامك عدا الحدود
دا ما فيش حد حبو قدك في الوجود
وانتي لسا بتحبيه
خايفه ليه تجرحيه
هوا جرحك وانتي صنتيه
وبتقولي مشتاقة للمسة اديه
ارفعي راسك لأنك عظيمه
حتي مشاعرك لسا بريئه
حتي قلبك بيقولك متكمليش وانتي بردو عنيده
بعد كل الجرح ده
بتقولى بحبه دى حاجة اكيدة
وانتي لسا بتحبيه
#لسا_بتحبيه
#الشاعر_البكواتى
الأحد، 3 أبريل 2016
انت فاكره...بقلم / علي عبد الباسط
انت فاكره هبكي بعدك
تبقي جاهله مافهمتنيش
ايوه احبك بس حبك
يعلي فيا مايوطنيش
يقوي فيا ما يهدنيش
يكونلي ظهر في وقت عوزه
يكونلي باب في وش ريحي
يكونلي بيت اروحله جري
وبعد موتي يكون ضريحي
دا الحب اللي يجيب ذل يغور
دا الكاس داور
وهتمعشق بعدك
ماانتيش جنه وما انتيش حور
عشان اصبر وانولك
وعشان ترميني في طولك
تسيبيني اعيش كومبارس
ووقت اليأس تجيني واكونك
غرورك صورلك انك
هتبقي في يوم بطلة افلامي
لكن كاست حكايتي اكتملت
وانتي يادوب ذكري في احلامي
كل كلامك عنك بس
امتي عيونك مره تحس
بإني المخرج وفي ايدي
دورك في حياتي ينقص
مش شرط الدور يبقي بطوله
او اكون حد بعضلات مفتوله
انا راضي بقصه بسيطه وسهله
انا قابل اغني "سينا كولا
عشان لو جلت مني في مشهد
اقول stop وانا بهرج
ولأن القصه في سينما الدنيا
انا زي الغير هقعد واتفرج
علي اكبر موهبه في التمثيل
علي احسن حد مركب وش
علي اغبي نقلة شطرنج
جيبتي نهاية الدور بغبائك
والجيم قفل " كش "
معروض عليا....بقلم / شريف ممدوح
معروض عليا دور ... اكون ديكور
جوه مسرح مهجور
مطلوب
اسيب ضميرى ... و اغش غيرى
واخبى نفسى ... بين السطور
معروض عليا ... ضحكة ... دبلانة ورا الستار
مقسوم عليا ... دمعة ... من سؤ الاختيار
بهرب من نفسى ممكن ... او بهرب من القرار
مفروض ف الصف أمشى .. ما أطلعش من الطابور
وأشوف العتمة و أهذى .. و أقول دا أمل و نور
معقول اسيب احلام .. جوايا ما تنتهيش
و أعيش كدا و السلام .. عشان أعرف أعيش
من وهم بعيشه دايما ... مليت ان م الطريق
و الفرح اقابله أحزن ... مادام مرهون بشئ
# شريف ممدوح
السبت، 26 مارس 2016
بعد بعدك ... بقلم / محمد منصور
لسه فاكر ضحكتك
لسه راسم خطوتك
لسه ماسك لعبتك
لسه ايديكي معلمة علي خدي
لسه شفايفي سأله عليكي
لسه عنيه شايفه عنيكي
لسه مشاعري بتجري اليكي
كل حاجة زاي ما هي
فستانك برفانك مكياجك
سحرك ودلألاك وحنانك
لسه بعدك لسه فارق
عيني عايشه ف مخاوف
حضني تاياه ف الشوارع
قلبي سكري يوم م سابك
شعري رافض الكتابه
كل شئ اصبح ف بعدك
كل شئ اصبح كئابه
حتي ليلي اصبح بدونك
شيطان عمال بيجرح
لسه ليكي ذكريات
لسه ليا معاكي معاد
لسه نبضي جوه قلبك
لسه قلبي سألني عنك
لسه ابني شايفه منك
لسه حلمي وياه حلمك
لسه بيتي مشتاق لبيتك
لسه حافظ نبض ساعتك
لسه حافظ لحن همسك
لسه عاشق لون عيونك
لسه روحي جوه روحك
لسه برده بشوف عيوبك
لسه فيكي الف حاجه
لسه فيكي كل حاجه
لسه برده زاي م أنتي
سايبه حاجه جوه قلبي
رغم بعدك زاد لوجعي
لسه بشتاقك يوماتي
لسه وعدك بيخاطبني
لسه حلمك بيحاوطني
رغم إني بعد بعدك
كل شئ أبعد ما يمكن
لسه أسمك جوه قلبي
لسه عيني سأله عنك
لسه صوتك بيناديني
لسه صورتك بتواسيني
لسه ذكرياتك معايا
لسه أنتي كل حاجه
في غيابك برده أنتي
في منامي برده أنتي
لسه شايف فيكي نفسي
لسه روحي عايشه فيكي
لسه برده يوم م سبتك
كل صورك بتنام ف حضني
لسه شايف بنتي جنبك
لسه شايف فيكي نفسي
لسه رغم بعد بعدك
قلبي نفسه ينام ف حضنك
#بعد_بعدك
#محمد_منصور
الثلاثاء، 22 مارس 2016
رسائل إلى بنت مخطوفة ...بقلم / عمرو اللمعي
للبنت اللي حاضنه كتاب
وخايفه من جميع الناس
وبتداري كمان خوفها
وطيبة القلب والاحساس
وعشمانه ف بيت طيب
وورده جميله ف الكراس
الهي تعيشي مبسوطه
وفرحه تدق عتاباتك
وتفتحلك كتير ابوب
وأشوفك واقفه بالابيض
مع نصك ف كتب كتاب
بتبكي كتير ومبسوطه
الي البنت اللي بتمني
تكون فرحتها زغروطه
#رسائل_الي_بنت_مخطوفه
#عمرواللمعي
ثم انت....بقلم / محمد منصور
ثم انت يعني نفسي
ويعني اسمي ويعني بنتي
يعني لما بحب اشوفني
بشوفك انت
يعني طفله بشوفها أم
يعني أم بشوفها طفله
يعني ضحكة بتبقي حفله
ثم انتي ف النهاية توينز روحي
بنت اصغر مني ياما
وعندها 20 سنه
بس اول لما بشوفها
بحس هي بتبقي انا
#محمد_منصور
الأحد، 20 مارس 2016
مر حلاوتك للشاعر / محمد صلاح (الشاعر البكواتي )
كنتي سايبة ألف ذكري
كنتي بتقولي راجعة بكره
حتي حضنك كان حزين لما بكي بألف دمعه
طيب ليه مدة غيابك وصلت لأطول فطره
سايبة ليه مر لحلاوتك
مش عايزة ليه تضممي جرحك
فكراني أهملت في حبك
انا كل ثانية ببص في صورتك
وبعد الايام في بعدك
فكراني انا الطبيب
انا لست اكثر من حبيب
مهما حاولت او لملمت عيونك عنى بتغيب
حتي لو كتبتلك الف وصفة من كتر
جرحك شعرى بيشيب
شيلي المر من حلاوتك
مهما كان حلو حبك
او حتى سكنت قلبك
وكتبت شعر فى عينيك
غيابك نساني حضنك
#مر_حلاوتك #نص_جديد #الشاعر_البكواتى
الأحد، 20 ديسمبر 2015
فص لمون بقلم الشاعر :: محمد سمير
الجمعة، 11 ديسمبر 2015
يا عنترة بقلم الشاعر : خالد الطبلاوي
انا آسف ...بقلم / رماح رماح
((أنا اسف))
انا اسف جدا من بره
لكن من جوه انا مش ندمان
قولتها علشان تفضلى حره
ولا اشوف ف مرايتى حد جبان
اختارى كواكب ومجره
اختارى لنفسك سكه أمان
----------------------------''
وهيفضل قلبي على التسبيح
وأسير النبض يصلى فروض
وهعيش لو حتى هعيش ميت
مقبلش اكونلك يوم مفروض
مش هسرق بكرا ف كراستك
ولا هعزف علي اوتارك عود
------------------------------''
مقدرش اخون ذكرى لقلبك
كان حلمه البيت والتكعبيه
كان املك اسره ولمه وغيط
وشجر متونس بالطيبه
وبرغم بساطة حلم ضعيف
والبعد تملى عن التكليف
فأنا أضعف منك ف الاحلام
وبلاش نشتري أضلاع خبيه
-------------------------------''
انا واثق جدا من نفسي
ياحبيبتى عشان واثق فيكى
واخترت أخون املى بيأسي
واخترت كمان أن ارضيكى
كان لازم اشترى مصلحتك
وأبيع الوهم اللى شاريكى
-----------------------------''
قولتلك انا اسف مش أكمل
صدقتى وكان غرضى احميكى
#ان_أسف#فراكيش #رماح
الخميس، 10 ديسمبر 2015
حبيبتي بقلم الشاعر : مصطفى ممدوح
مافيش وصف اتكتب إلا
وقال التاني : "إشمعنى ؟!!
كفاية عمالين نوصف بنات غيرانة بتقلد !!"
بدون مايسمي .. ويكبر ،،
أنا عاشق تراب حسد التراب اللي
بتمشي عليه ..
وتتمختر ،،
وسحرها لما اقول عاشق ،،
خجلها يرد : انا أكتر !!
وإهدار الغوالي فداه ،،
كفاية كل ما بشوفها
بينطق كل شيء فيا يقول الله !!!
الأربعاء، 9 ديسمبر 2015
مفتتح بقلم الشاعر : محمد سمير
......
أنا لما بضمك بس عشان مشتاق جدا
لضلوعى اللى بتكمل بيكى حاجه وعشرين..
..........
وابتدت رحلة حياه..
أصبحت بضلوعها كامله..
هوا خارج ضلع ناقص
أما هيا ضلوعها كامله..
ضرب حسبه مش بسيطه
ناتج الحسبه : الحياه
كل حاجه بدون إحم / إلا الرحم
انت آدم جوه حوا !!
بس جوه (قرار مكين)
وبخروجك..
هى رحلة ألف ميل؟
نجتهد _ نعمل بجد _ ويتحفظ بردو الجِمِيل..
ناقصه صبر يكون جَمِيِل..
نقدر معاه نصلب فى ضهر الدنيا زق
أصل كل حاجه ( آه )
مش أصل كل حاجه ( لأ )
إحنا الشواكيش بقلم الشاعر : محمد جوده
مافاضلش فصبري لاولادي
غير حبه خيش
ورغيف العيش
قرر يحرمنا من النعمه
ويبات في بطون اللي واجعنا
ويقولك عيييش
ما ده اصله الجيش
عاوز يحمينا من الفتّه
وتوابع امراضها الستّه
والستّه بتزنق في الستّه
(ستّه وستّين)
يحكمنا مناضل بالعافيه
وبياكل حقنا بالقافيه
طبعا فاهمين
وطريقنا منين
لما الاحلام بتضيع منا
وبتسرق حقنا في المنّه
وبنشرب كاس بتأن ننا
لجل اما يعيش
ملعون ال ... عيش
لو جاي محنّي باوجاعنا
وبيكسر حلم بيسمعنا
حبّه الاضيش
بيقولوا مفيييش
ولذلك طبعا يا بلادي
قررت الم لم اولادي
ونقول للبادي
واحفادي
احنا الشواكيش
