إحتياج بقلم الشاعرة : رماح رماح

ولأن الشئ بلزوم الشئ
ف احتياجى ل بعدى عنك
كان نتيجة ضلع ناقص 
من ضلوعي
حتى جوعي يوم رجوعي
كان نتيجة إحتياج

لما أكون ف القرب منك
ناقصه روح
لما أكون وأنا جوه حضنك
ليك ببوح
وانت مش سامع لنوحي

يبقى لازم أكسر الضلع اللي غايب
يبقى كان لازم أحس إن قربك زي بعدك
وإحنا أصلا مش حبايب

كان ليه بتنسب كسرنا
لعجز ف شوية ظروف
كان ليه نداري عجزنا
ف عيون حقايق
ملامحها قاسية ..بتنعي خوف ..

كان ليه نطوف إنت وأنا على طرف
نجمة تايه فوق مجرة جوفها طارح للبعاد
حتى اللي باقي مننا كان حفنه لشويه
بواقي لروح بيسكنها العناد
حتى قلوبنا في المزاد
رفضت تسلم دقنا ..

أنا مش سلالة أنبيا
ولا نبته من بذرة شيطان
أنا لسه نبضي ليك وعاجزه
أمحي رسمك م الحيطان
وقبل م تمشي جاوبني
قولي كيف قلبك قوي؟؟
وخد معاك قلبي الجبان