هتصدقيني بقلم الشاعر : أحمد مرزوق

هتصدقيني إن قلتلك
إن الحياة من غير حيطان المعتقل
أكبر مافيش
و إن انكسارك ليلة بإيدين عسكرى
اهون كتير
من هتك عرض الدنيا بإيدين الشاويش
و إن الحشيش
ما بقاش بيفرق فى الوجع
جوايا صاحب مش جدع
غمض عيونه المجهدة
و وصاني يومها ما انحنيش
و رماكي أسهل صيدة في ايدين العدو
فبقيتي شمعة بتتحرق
و برغم كل النقص فيكي ما تنتهيش
إسمك قصيدة مدهشة
و عينيكي صورة واصله حد الإكتمال
و احنا يا دوب حبة عيال
بنخانق الصبح اللي ردد بسمتك
و نعيب في ضوء الشمس إنه ما صحناش
بنشوف طشاش
و بنشكر الرب لوجودنا آمنين
بنرج أبواب السما
مش بالدعا
لكن بحصر الميتين
بنكسّر الحلم اللي فاضل مننا
و بنشتهي
كل اللي داسوا حينا
و بنرتجي
عطف الشاويش
هتصدقينى إن قلتلك
إن الحياة من غير حيطان المعتقل
أكبر مافيش