الدرويش ******بقلم / لمياء حمدي

الدرويش

********

وخطي اول خطوتك 

في شكوتك للناي والعود 

خلي الدواير رحلتك

ومن سكتك اوعى تعود 

دووور في لفايف تلف تلف 

تسيب الدنيا .. تشوف النور 

بخيالك تسبح 

بينك وبين نفسك 

وبينك وبين قلبك 

تشكي غلبك لعروسة الحور 

عن سكتك .. عن دنيتك

اللي سكنها البور 

تقول الاهه في لفة طويلة 

متلهفة لحلول 

ترسمها في دمعة 

يصقف لك الجمهور

يملا الناي بدمعك بحور وبحور

وانت والناي متغربين 

عايشين ومش عايشين 

بتسحبك آهه .. ويلفك حنين 

تعزف بخطاوي لفتك لفة ولفة

والف لفة ولفة 

والقمر في مدارك بلور

والشمس تفرش خطوتك 

متعطرة ببخور 

فدور في لفايف خطوتك 

واوعى تعود 

.

.